A clear conscience is usually the sign of a bad memory.

Ég var andvaka í nótt og að lokum settist ég við tölvuna og fór að lesa hin og þessi moggablogg, út frá fréttum á mbl.is. Ég komst að því að það eru nokkrir einstaklingar sem eru að eyðileggja þennan möguleika okkar á frjálsri umræðu um fréttir á netinu. Nokkrir bloggarar og fólk sem að skrifar athugasemdir við blogg annara, skrifa svo hrikalega ósmekklega að ég þori ekki einu sinni að vitna í það hér. Ef að mogginn væri bara að loka á þá sem eru harkalegir í pólitískum umræðum eða heldur harðorðir í garð sumra, væri það ritskoðun. En ég hef séð ritaða hluti innan kerfisins sem er svo viðurstyggilegt að maður svitnar. 

Ég skil fullkomlega vel að þó svo að bloggfærslan sé alfarið á ábyrgð skrifanda en endurspegli ekki á neinn hátt skoðanir eða afstöðu mbl.is, og Morgunblaðsins, þá vilji þeir ekki hýsa þann viðbjóð sem sumir láta út úr sér. 

Þetta mun aðeins leiða til þess að mogginn þarf að loka á athugasemdir þeirra sem koma ekki undir nafni, síðan loka á ákveðnar IP tölur, loka á fleiri bloggara, loka á fleiri fréttir og hver veit að þetta verði síðar svo flókið að þeir loki bara á moggabloggið allt eins og það leggur sig.

Pólitísk umræða verður oft að vera hvöss og það er óhjákvæmilegt að einhverjir móðgist eða að fólk verði jafnvel sárt. En með óþarfa sóðakjafti er verið að eyðileggja þetta fína kerfi, sem moggabloggið er, og vettvang okkar til þess að tjá okkur um málefni líðandi stundar. 

Á Eyjunni (eyjan.is) eru lesendur beðnir að koma til liðs við sig og bæta notkun ummælakerfisins með því að nota alltaf rétt nafn og halda umræðum innan heilbrigðra marka.  Þeir segja að umræðan megi vera gagnrýnin, afdráttarlaus og hvöss, en hún þurfi að vera efnisleg og ekki verði liðið að settar séu fram rangar staðhæfingar, dylgjur, ærumeiðandi ummæli eða hótanir. Mogginn ætti að sjálfsögðu að geta farið fram á það sama.

Umræðuhættir á netinu